ارفعي صوتك فوووق أنتي مصرية

قوليها بصرخة قووية

أيوا أنا مصرية

معلش يا رجالتنا المرة دية

النهاردة بكون عنصرية

وفي كلامي بضيف التاء التأنيثية

الظاهر انهم نسيوا المرأة المصرية

اللي كتف بكتف الراجل في ثوراتنا التاريخية

نسيتوا عائشة بنت الشاطئ وصفية؟

اللي درسناها في كتبنا المدرسية؟

وربيتوا فينا صرخاتهم القوية

علشان نتحرر من القوات الاستعمارية

لازم كل مسئول في البلد دية

يعرف ازاي يتعامل مع المصرية

قالوا في طبعنا الحنية

بس متنسوش القسوة المخفية

قالوا فينا دلع وخفية

بس في وقت تتطلع الخشونة والعصبية

قالوا فينا بنحترم القوة العسكرية

لكن يوم ما تنهان المصرية

وتتعرى جسدا.. وهوية

وتلقى على الأرض القاهرية

وبنفس الأيد العسكرية

ننسى اللي اتقال في الصبح والعشية

يعني لا دلع ولا خفية ولا حنية

وتتطلع القسوة والخشونة والعصبية

تعتبروها تحذير أو تهديد مش دي القضية

بس الأكيد انها صرخة في قلب مصرية

عهد السيد